Volume 6 – Hoe Om Geestelik Te Groei
R145.00
Geestelike groei is nie ’n opsionele pad vir die toegewyde nie, dit is die enigste pad vir elkeen wat wil leef in die volheid van God. Die Skrif leer ons dat ons geveg nie teen vlees en bloed is nie, maar teen die bose magte in die lug. Hierdie stryd vind nie plaas op die grond nie, maar in die atmosfeer van die onsigbare. Die eerste hemel is wat ons met ons oë sien, die lugruim, en die skepping rondom ons. Die tweede hemel is die plek van geestelike konflik, waar die duisternis weerstand bied teen die lig, waar engele en demone stry oor die lot van mense, waar gebede vasgehou word, en antwoorde vertraag word. Die derde hemel is die woonplek van God, die troonkamer van lig en waarheid, die plek waar geen duisternis kan bestaan nie. Tog is dit juis daarheen waar die mens geroep word; nie net na die hemel as bestemming nie, maar na die hemel as dimensie van verhouding en openbaring.
Daniël se gebed is ’n sleutel tot hierdie bestaan. Hy het gebid vir een-en-twintig dae; nie omdat God hom nie gehoor het nie, maar omdat die antwoord vasgehou was in ’n stryd wat hy nie kon sien nie. Die engel wat gestuur is met die antwoord is teëgestaan deur die vors van Persië, ’n demoniese mag wat in die tweede hemel opereer. Migael moes kom help om die pad oop te maak. Hierdie verhaal wys dat gebed nie net kommunikasie is nie, maar beweging. Gebed is nie net woorde nie, maar ’n geestelike verheffing, ’n deurbreek, ’n stryd; en tog is gebed nie die fokus van hierdie boek nie, want gebed is reeds in van my ander boeke behandel. Hier gaan dit oor die groei wat gebed moontlik maak, die dimensie wat gebed ontsluit, die volwassenheid wat gebed vorm.
E-BOEK BINNEKORT BESKIKBAAR
Daar is ’n roepstem wat nie uit die mens kom nie, maar uit die hart van God. Dit is nie ’n sagte stem wat gemak belowe nie, maar ’n heilige roep wat die gees uitnooi om op te staan uit die vleeslike roes. Die Gees roep nie diegene wat tevrede is met oppervlakkige geloof nie, maar dié wat ‘n honger het na diepte. Ons leef in ’n tyd waar die gees van die mens stil geword het, nie in rus nie, maar in verdowing. Die vlees het die oorhand gekry, en die siel het geleer om gemak bo waarheid te kies. Die wêreld leer ons om te leef volgens wat ons sien, voel en begeer, maar die Gees roep ons om te leef volgens wat ons nie sien nie, maar weet. God is Gees, en wie Hom wil dien, moet Hom in gees en in waarheid dien.
Die geestesrealm is nie ’n verbeelding nie, dit is die werklikheid waarin alles begin en eindig. Die fisiese is tydelik, maar die geestelike is ewig. Tog probeer die mens om die geestelike realm te betree met ’n vleeslike ingesteldheid, en dit is waarom soveel bly staan voor geslote deure. Ons as gelowiges is posisioneel gesit saam met Christus in die hemele, met mag oor elke krag van die vyand. Die vraag bly immers, hoekom leef ons nie so nie? Hoekom is dit dat satan-aanbidders, okkultiste, en ander godsdienste wat nie die ware lewende God dien nie, soveel geestelike invloede uitoefen? Nie omdat hulle meer waarheid het nie… maar omdat hulle dit beoefen.
Hulle verstaan die beginsels van geestelike aktivering. Hulle weet hoe om te fokus, te spreek, en te beweeg in die onsigbare realm. Alhoewel hulle nie die waarheid het nie, het hulle ’n vorm van krag, en hulle gebruik dit. Intussen het ons wat in Christus is, die volheid van gesag oor elke mag van die vyand, maar ons weet nie hoe om dit toe te pas nie. Nie omdat dit nie aan ons gegee is nie, maar omdat ons nie weet hoe om dit te gebruik nie. Ons weet nie wat om te doen nie, daarom doen ons niks. Die mag is daar, maar die aktivering ontbreek.
Reviews
There are no reviews yet.